რა გვიჯდება მუნიციპალური საფეხბურთო კლუბი?

საფეხბურთო კლუბ „მერცხალის“ საბიუჯეტო დაფინანსება 2009-2015 წლებში:

2009 - 145.9 ათასი ლარი

2010 - 161.3 ათასი ლარი

2011 - 238.7 ათასი ლარი

2012 - 292,8 ათასი ლარი

2013 - 295 ათასი ლარი

2014 - 310 ათასი ლარი

2015 - 366,9 ათასი ლარი
სულ - 1 მლნ 810 ათასი ლარი

2016 - 427,5 ათასი ლარი (პროექტი)

უნდა აღინიშნოს, რომ „მერცხალი“ ორი იურიდიული პირის სახით არსებობდა: საფეხბურთო კლუბი და ცენტრალური სტადიონი. ზემოთმოყვანილ მონაცემებში ორივე იურიდიული პირის დაფინანსება დაჯამებულადაა მოცემული. 

ორიოდე მონაცემი იმის შესახებ, რას წარმოადგენს „მერცხალი“. ესაა ევროპის მასშტაბით ერთ-ერთი უსუსტესი საფეხბურთო ჩემპიონატის (უეფას ოფიციალური კოეფიციენტთა სისტემით 36-ე ადგილი 54 ქვეყანაში) მეორეხარისხოვანი ლიგის (პირველი ლიგა, სადაც „მერცხალი“ თამაშობს, არის მეორე დონის ლიგა საქართველოში. მასზე მაღლა დგას უმაღლესი ლიგა) მაჩანჩალა გუნდი, რომელიც ყოველწლიურად იბრძვის ამ ლიგაში ადგილის შენარჩუნებისთვის. 

სეზონი

მაქსიმალური რაუნდი თასზე

ადგილი ჩემპიონატში

2009-10

1/8

მე-9 ადგილი, 15 გუნდი

2010-11

1/16

მე-13 ადგილი, 17 გუნდი

2011-12

1/16

მე-8 ადგილი, 8 გუნდი პლეი-ოფში

2012-13

1/16

მე-8 ადგილი, 11 გუნდი

2013-14

1/16

მე-9 ადგილი, 13 გუნდი

2014-15

1/16

მე-5 ადგილი, 9 გუნდი

2015-16 პირველი წრე

1/16

მე-18 ადგილი, 18 გუნდი

აქ არის ცდუნება, რომ კლუბის წარუმატებლობა დაბრალდეს ფეხბურთელს, მწვრთნელს, მსაჯს, პრეზიდენტს და ა.შ. მაგრამ 7 წლის მანძილზე იცვლებოდნენ ფეხბურთელებიც, მწვრთნელებიც, მსაჯებიც, პრეზიდენტებიც და უცვლელია შედეგი. მეორე ცდუნებაა, მოვინდომოთ მეტი დაფინანსება და მეტი შედეგი, მაგრამ „მერცხალი“ პირველი ლიგის აუტსაიდერი გუნდი იყო 145 ათასი ლარის დაფინანსებითაც და ისეთივე აუტსაიდერია 366 ათასი ლარითაც. პრობლემის არსი შემდეგშია

1. საფეხბურთო კლუბის დაფინანსება ადგილობრივი თვითმმართველობის კომპეტენციას არ წარმოადგენს კანონის (ორგანული კანონი თვითმმართველობის კოდექსი) მიხედვით. ადგილობრივი თვითმმართველობის საკუთარი სახსრები კი სწორედ ექსკლუზიური კომპეტენციების განხორციელებაში უნდა იხარჯებოდეს 
2. ღარიბ ოზურგეთს, არასრული 8 მილიონიანი ბიუჯეტით, საფეხბურთო კლუბის შენახვის ფუფუნება არ აქვს
3. მუნიციპალურ საფეხბურთო კლუბს არანაირი სპორტული პერპექტივა არ აქვს. საქართველოს უმაღლეს ლიგაში მოასპარეზე მუნიციპალური კლუბებიც (ს.კ. „ზუგდიდი“, ს.კ. „გურია“) მილიონობით ლარს ხარჯავენ საბიუჯეტო სახსრებიდან, მაგრამ არანაირი სპორტული მიღწევებით არ გამოირჩევიან.

ჩვენ ვიცით, რომ დანახარჯი არაა მხოლოდ თანხის ის რაოდენობა, რაც გადახდილია ამა თუ იმ მომსახურებასა თუ პროდუქტში, არამედ ის გამოუყენებელი ალტერნატივა, რისი შეძენა/განხორციელებაც შეიძლებოდა ამ თანხის საფასურად. ასე რომ თუ დავითვლით, ვნახავთ, რომ 2009-15 წლებში „მერცხალზე“ 1 მლნ 810 ათასი ლარია დახარჯული, რაც ნიშნავს, რომ ჩვენ საფეხბურთო კლუბის შენახვის გამო უარი ვთქვით ქვემოთ ჩამოთვლილ, ქალაქისთვის ძალიან მნიშვნელოვან ალტენატივებზე:

• ქალაქის ერთიანი კანალიზაციის სისტემის და გამწმენდი ნაგებობის მოწყობა, ქალაქის მდინარეების გასუფთავება და რეაბილიტაცია 
• ე.წ. გენგემის ანუ მიწათსარგებლობის და განაშენიანების რეგულირების გეგმების  შემუშავება და მიღება
• ექადია-ანასეულის წყალმომარაგების სისტემის სრული რეაბილიტაცია 
• თანამედროვე და ეკოლოგიური მუნიციპალური ტრანსპორტის შემოღება
• ქალაქის ბიბლიოთეკის ან მუზეუმის შენობის კაპიტალური რემონტი
• ქალაქში ველოტრასების და ველოპარკინგის მოწყობა

სატურნირო ცხრილი

ამჟამად „მერცხალი“ პირველი წრის, 17 მატჩის, შემდეგ პირველი ლიგის ბოლო, მე-18 საფეხურზე, ანუ ლიგიდან გავარდნის ზონაში იმყოფება. წინ ჩემპიონატის მეორე წრეა, რომელიც თებერვლიდან მაისის ჩათვლით გაიმართება, გუნდები კიდევ 17 მატჩს ითამაშებენ. თეორიულად არსებობს შანსი, რომ „მერცხალმა“ დაიკავოს მე-15 ან უფრო მაღალი პოზიცია და შეინარჩუნოს ადგილი ლიგაში. მაგრამ „მერცხალის“ ბუნდოვანი პერსპექტივის სანაცვლოდ 427,5 ათასი ლარის გამოყენებისთვის არსებობს  მინიმუმ შემდეგი არჩევანი:

• ერთი ახალი საბავშვო ბაღის აშენება ან ერთი არსებულის სრული კაპიტალური რემონტი და აღჭურვა
• ქალაქის ყველა ბაღის, პარკისა და სკვერის სრული რეაბილიტაცია
• ისტორიული აბანოების არქეოლოგიური ნაშთების გადახურვა და მიმდებარე ტერიტორიის მოწესრიგება
• ქალაქის ყველა საზოგადობრივი სივრცისა და შენობის (სკოლები, ბაღები, მოედნები, სკვერები, სამთავრობო და სხვა დაწესებულებები და ა.შ.) wi-fi დაფარვის უზრუნველყოფა ან ქალაქის ძირითადი ნაწილის ოპტკურ-ბოჭკოვანი კაბელით დაქსელვა
• მუნიციპალური სპორტული ცენტრის სრული რეაბილიტაცია  და თანამედროვე ინვენტარით აღჭურვა
• ქუჩების აღმნიშვნელი აბრების, საინფორმაციო დაფების, მიმართულების მანიშნებლების, ტურისტული რუკების დამონტაჟება მთელ ქალაქში

ცხადია, საზოგადოებას შეუძლია განავრცოს ეს სია, იმსჯელოს აწონ-დაწონოს და ისე გააკეთოს არჩევანი.